Mini Dienstleistig isch wie Fast Food: jedä liebts, jedä chasechs leischtä, mä chasech d «Bstellig» ganz individuell zämmesteu und z Ergäbnis hesch schneuer aus bimnä Gourmet-Fotograf 😉
machuleyes
Shootingart / Alass (inkl. Bearbeitig)
Priis (ohni Spesä)
Einzushooting (max. 30 bearbeitete Bilder)
CHF 150.00
Päärlishooting (max. 30 bearbeitete Bilder)
CHF 200.00
Einzushooting mit Hustier (max. 30 bearbeitete Bilder)
Hesch du ä Speziauwunsch? De schrib mir doch uf Insta
redä mir drüber 🙂
Priisliischtä chula_clips
Genereu giut:
Ort: Da steit üs aues offä, mir chöi kreativ sy, eifach es Studio hani nid
Zyt: Ca. 2-3h reins fötelä/fiumä (Zytfänschter für mi ca. ä haubä Tag, ohni z Bearbeitä)
Föteli/Videos: Föteli/Videos machi vili, meischtens so 180-400 Stück, je nach Shootingart/Alass. Es isch ir Regu auso kes Problem uf die 30 – 50 Biuder/Videos* zcho, wo söuä bearbeitet wärde.
Bearbeiteti Ufnahmä:
Bi dä machuleyes-Ufträg isches so, dass mini Arbeit denn fertig isch, wenn d Biuder bearbeitet sy. Ergo gibi ou nur die bearbeitetä Biuder wyter.
Bi dä chula_clip-Ufträg isch mi Job ganz klar z Ufnäh vo dä Biuder u Videos. Klar isch o da für mi z Produkt ersch fertig u perfekt, wes bearbeitet isch. Aber da sich das Agebot oft a Contentcreater richtet, chas guet sy, dass mini Ufnahme ohni Bearbeitig gwünscht sy. Teil mir därum bitte mit, wenn du ke Bearbeitig wünschisch. Us fougende Gründ isch hie dr Priis chly höcher agsetzt: > wüu sich das Agebot a Business-Ladies und -Gents richtet, wo drmit Gäud verdiene > wüus ä Kombination vo Fotos und Videos isch > wüu z Model oft gnaui vorstelligä het zum ihri Markä verkörpere, was z Shooting für mi chly Aspruchsvouer macht > wüu dr Chund, uf explizite Wunsch hi, aui Originaubiuder überchunt
Bi beidnä Brands giut: Weli Biuder bearbeitet wärde, darfsch du (mit)entscheide oder mir das überlah.
Transfer: Die (bearbeitete) Ufnahmä chani per AirDrop / WhatsApp (HD) schicke oder uf WeTransfer ladä u dert chaschsä innert 3 Täg abeladä (choschtälos).
Spesä: CHF 1.- pro km
Erklärig zum Verrächne vo de Spesä: Bire Strecki vo 25 km häre u 25 km zrüg, ergo insgesamt 50 km Wäg, symer bi CHF 50.- Chöschtä zulaschtä vo dir (vom Chund) – zuesätzlech zum Priis, wo du fürs Shooting zaussch (obe ir Tabäuä).
Je nach däm, wo mir üs träffe, nimi ou no chly öbis fürd Parkspesä. D.h. we mir üs ire Stadt träffe, woni imne öffentleche Parking parkiere, chöme da ou no CHF 10.- bis 20.- drzue (z.B. z Bärn, CHF 20.- für 4h).
Bezahlig: Zahlä chasch du bitte diräkt bim Shooting, entweder in Bar oder mit Twint.
Mitbringä: Viu Bock u aus wod ufem Biud wosch ha (z.B. zwöi, drü Outfits oder ä Requisite, Accessoires uso)
Wichtig: Du muesch keni Modelerfahrig ha u ou süsch nüt chönne usser zuelose – i hiufe dir u zämä schaffe mir das u heis luschtig 🙂 U z Ergäbnis wird toll! I wott das ganze so unkompliziert u entspannt haute, wie müglech, drum gibi ou nid gärn ä ganz genaui Zytduur oder Azau vo Biuder ah. Jedä Mönsch u jedes Shooting isch angers u es söu chly uf das abgstummä sy.
*Die obe agähni Azau fürd Mängi vo (bearbeitete) Biuder/Videos söue aus Richtwärt diene und üs bim zämmeschaffe nid brämse. I ha us mim Erfahrigswärt itz mau so Richtwärte agäh, wüui drnah öfters bi gfragt worde.
